Pehle Pyaar Karna Seekho …
Kal ek baat kisi bahut badi hasti se sunne ko mili … aur main kaafi der tak ussi mein kho gaya.
Main soch raha tha …
Hum itni jaldi nafrat karna kaise seekh jaate hain…
lekin pyaar karna itna mushkil kyun lagta hai?
Jaise andar se kisi ne dheere se samjhaya…
“Jis dil mein prem hi na ho … uske andar desh prem kya hoga …”
Main thoda ruk gaya …
Baat simple thi … par seedha dil tak ja rahi thi.
Phir khud se hi poocha —
kya sach mein hum pyaar karna bhool gaye hain?
Roz ki zindagi mein…
kabhi bina wajah hi mann mein
dwesh, irshya aur nafrat jagah bana leti hai …
aur hum dheere dheere
mohabbat, pyaar aur prem se door hote jaate hain.
Aur phir bhi…
andar kahin kabhi sukoon nahi milta.
Usi bechaini ke beech, bhale der se sahi,
ek baat samajh aane lagti hai…
“Mohabbat, prem, pyaar…”
hi sab kuch hai …
Aur phir unhi hasti, yani Santosh Anand ji ke likhe hue mashhoor geet ki ye pankti yaad aa jaati hai —
“Laakh gehra ho saagar toh kya … pyaar se kuch bhi gehra nahi.”
Us pal laga…
shayad zindagi utni uljhi hui nahi hai,
jitna hum use bana dete hain.
Shayad agar pyaar, mohabbat aur prem
ko dil se gale se laga diya jaaye …
toh saari uljhane
aap hi aap khud hi sulajh jaayengi.
(Yeh ehsaas mashhoor geetkaar Santosh Anand ji ke shabdon se prerit hai.)
