Safar Kitabon Ka – Adab aur Sukoon
Aaj main aapse ek aise shakhs ka zikr karna chahta hoon jinki likhai mujhe hamesha pasand aayi hai — Janaab Sadiq Ansari sahab.
Sadiq bhai hamare mulk ke bahut umda playwright hain. Unhone kai behtareen natak likhe hain aur theatre ki duniya mein apna ek khaas maqam banaya hai.
Khair …
Aaj unse baat ho rahi thi to unhone ek bahut khoobsurat baat kahi.
Unhone kaha:
“Chahe aap kisi bhi field se talluq rakhte hon, lekin dil aur dimaag ka sukoon adab se milta hai. Aur sabse aham baat, adab humein zyada dardmand aur doosron ke jazbaat samajhne wala insaan banata hai.”
Mujhe laga jaise woh meri hi ek purani soch ko alfaaz de rahe hon.
Mujhe bhi jab bhi mauqa milta hai, kuch na kuch padhne ki koshish zaroor karta hoon — chahe woh Hindi ya Marathi sahitya ho, Urdu adab ho, ya phir kabhi-kabhi Angrezi literature.
Aur shayad isi liye …
Sadiq bhai ki baaton se mutasir hokar, main aane wale hafton mein ek chhoti si series shuru karne wala hoon.
Un kitaabon aur tahreeron par jo mujhe pasand hain, ya jinhe padhne ki tamanna abhi baaqi hai.
Ummeed hai ki aapko yeh safar pasand aayega — aur hum milkar adab ki us duniya mein qadam rakhenge jahan alfaaz sirf kahaniyan nahin sunate, balki insaan ko behtar bhi banate hain.
