“Tujhe takleef nahi doongi to kisko doongi …”
Kal raat baith kar purane notes dekh raha tha … toh ek line mili… aur main wahi ruk gaya.
Ek din ki baat hai … maa ko khaana khilane aur dawai dene mein kaafi waqt lag raha tha. Main thoda thak gaya tha … aur shayad uss din sabr bhi kam tha.
Gusse mein maine jhunjhla kar keh diya —
“seedhe se khaana aur goli kyon nahi khaati … mujhe kyon itni takleef deti hai?”
Maine socha shayad woh kuch bolegi … ya chup ho jayegi.
Lekin unhone meri baat ko jaise suna hi nahi … bas pyaar se dekha… aur halki si muskurahat ke saath kaha —
“tujhe takleef nahi doongi to kisko doongi …”
Un dino woh dementia se bhi guzar rahi thi … shayad isliye unki baaton mein bachpana bhi tha, aur gehra pyaar bhi.
Us waqt main chup ho gaya tha … shayad samajh nahi paaya tha.
Aaj samajh aata hai …
woh takleef nahi thi …
woh haq tha.
woh pyaar tha.
woh rishta tha … jo sirf maa deti hai.
Aaj maa saath nahi hai … lekin unki woh ek line … aaj bhi saath hai.
Aur har baar yaad aati hai … toh dil halka bhi ho jaata hai … aur bhari bhi.
Allah meri maa ko jannat naseeb kare … aur duniya ki tamaam maaon ko sehat aur khushiyan ata farmaaye … Ameen.
